Guy Hopwood (Cadeirydd)

Mae Guy Hopwood yn ymgynghorydd ynni adnewyddadwy, sydd wedi byw yng Ngheredigion ers 1972.

Mae Guy wedi bod yn rhan o ddatblygu amrywiaeth o gynlluniau  ynni adnewyddadwy ers 2010, gan gynnwys tyrbin gwynt 500kW yng Ngheredigion ac un arall yn Sir Gâr, ac mae hefyd yn fuddsoddwr mewn sawl prosiect gwynt a solar ffotofoltäig cymunedol yng Nghymru.

Ar hyn o bryd, mae Guy yn gweithio i YnNI Teg (YT), datblygydd ynni adnewyddadwy cymunedol sydd â’i dyrbin gwynt 900kW ei hun yng Nghaerfyrddin yn ogystal â system FF solar a gwblhawyd yn ddiweddar.

Mae’n gyfrifol am ddatblygu prosiectau newydd ar gyfer YT yn ogystal â darparu cefnogaeth i sefydliadau Ynni Cymunedol eraill ledled Cymru. Mae YnNi Teg yn gweithio ar hyn o bryd ar ddatblygu ail dyrbin gwynt 900kW yng Ngheredigion, a ddylai fod ar waith erbyn diwedd 2025. Mae Guy hefyd yn ymddiriedolwr yr Ymddiriedolaeth Shared Earth sydd wedi’i lleoli yn Fferm Denmarc ger Llanbedr Pont Steffan.

Lindsay Thomas (Trysorydd)

Symudodd Lindsay Thomas i Gymru dros 40 mlynedd yn ôl, a ganwyd a magwyd ei phedair merch yma, gan fynychu’r ysgolion lleol a mynd ymlaen i brifysgolion.

Mae Lindsay yn byw ger Cribyn gyda’i gŵr Jason mewn tŷ hir traddodiadol Cymreig, ar 6 erw, sydd yn brosiect parhaus ac angerdd mae’r ddau’n ei rannu. Maen nhw wedi adnewyddu’r bwthyn, ysguboriau ac adeiladau allanol, wedi plannu coed a gosod FF solar a phaneli thermol solar. Mae Lindsay hefyd yn mwynhau cadw gwenyn, cwiltio a darganfod rhannau llai adnabyddus y sir trwy deithiau cerdded gwledig gyda grŵp lleol.

Yn flaenorol, roedd hi’n rhedeg busnes bach cyhoeddi a gwasg yng Ngheredigion, ond mae hi bellach wedi ymddeol yn rhannol ac yn gyfarwyddwr sefydlol GCE. Mae hi’n benderfynol o wneud i hyn weithio, er lles yr amgylchedd a’r gymuned, ac i helpu i ariannu mentrau amgylcheddol lleol.

Mae hi eisiau gweld mwy o brosiectau fel hyn yn dwyn ffrwyth, ynni a gynhyrchir yn lleol ar gyfer cymunedau lleol, gan ddiogelu adnoddau gwerthfawr ar gyfer cenedlaethau’r dyfodol, gan gynnwys ei hwyrion.

Ar ôl byw’n syml ac oddi ar y grid am flynyddoedd lawer, mae hi bellach yn mwynhau adfer a gwella hen adeiladau i sicrhau cydbwysedd rhwng harddwch y traddodiadol a’r effeithlonrwydd ynni sy’n hanfodol i’n planed.

Jane O’Brien

Mae Jane yn Rheolwr Datblygu i YnNI Teg (YT – ers Hydref ‘21), gan nodicyfleoedd i gyflawni prosiectau ynni cymunedol sydd dan ddatblygiad. Mae ganddi MSc (Peirianneg) mewn Rheoli a Chadwraeth Ynni, ac wedi gweithio yn y sector cynaliadwyedd ers dros 25 mlynedd.

Mae ganddi brofiad o gyflawni amrywiaeth o brosiectau, gan gynnwys mentrau adnewyddadwy, a darparu gwasanaethau i awdurdodau lleol a gwasanaethau’r llywodraeth, sectorau masnachol a chymunedol. Mae ei sgiliau’n cynnwys troi syniadau’n brosiectau realistig, ac am dros 10 mlynedd bu’n gweithio i RENEW Wales gan gynorthwyo dros 35 o brosiectau, yn amrywio o ddatblygu tyrbinau gwynt, i dyfu bwyd, iechyd a lles.

Hefyd yn gyfarwyddwr gwirfoddol Community Energy Pembrokeshire, arweiniodd dîm bach i gyflawni tyrbin gwynt 800kW yn Ne Sir Benfro. Yn ei barn hi, dull cyfannol o ymdrin â chynlluniau ynni yw’r ffordd ymlaen, gan gynnwys rheoli’r grid, storfa, technoleg, datblygiadau trafnidiaeth (ac yn hanfodol i bopeth, effeithlonrwydd ynni).

Mae Jane a’i gŵr Martin yn berchen ar fusnes eco-dwristiaeth bach, North Lodge Eco Holidays, sy’n cynnig gwersylla traddodiadol ac unedau hynod oddi ar y grid gan gynnwys lori geffylau wedi’i haddasu. Mae hwn wedi’i leoli yn harddwch Sir Benfro, yn agos at Aberteifi ac ardal Dyffryn Teifi.

Brian Mark

Mae Brian yn byw oddi ar y grid yn Llandudoch ger Aberteifi, ac mae’n beiriannydd gwasanaethau adeiladau masnachol wedi ymddeol, ar ôl bod yn bartner sefydlol yn Fulcrum Consulting: oedd, ar un adeg, yn ymgynghoriaeth peirianneg gynaliadwy arbenigol, gyda 200+ o beirianwyr.

Mae Brian yn arbenigwr ar adeiladau ynni isel a dylunio dinasoedd gan gynnwys cynhyrchu ynni adnewyddadwy lleol ac integredig ac, oherwydd hynny, gofynnwyd iddo wasanaethu ar y Bwrdd Ymgynghorol Ynni Adnewyddadwy, gan gynghori’r llywodraeth ganolog ar y dull gorau i gyflawni pob targed ynni adnewyddadwy cenedlaethol, Kyoto a’r Undeb Ewropeaidd.

Mae Brian yn credu’n gryf ym manteision perchnogaeth gymunedol ar asedau, gan gynnwys cynhyrchu ynni, ac mae ganddo brofiad lleol o gyflawni cynlluniau perchnogaeth gymunedol o’r fath yn llwyddiannus fel cyfarwyddwr 4CG am sawl blwyddyn (sef y sefydliad datblygu cymunedol hynod lwyddiannus sydd wedi’i leoli yn Aberteifi).

Martin Roger

Graddiodd Martin Roger o’r brifysgol yng nghanol y 70au gyda gradd mewn ffiseg ac mae wedi gweithio ers hynny fel peiriannydd dylunio mewn cwmnïau sy’n arbenigo mewn systemau electronig cyfathrebu.

Mae ganddo ddiddordeb mewn datblygiad cymunedol ac fe sefydlodd elusen i gefnogi addysg plant yng Nghanolbarth America gan bwysleisio traddodiadau diwylliannol ac artistig. Mae gan yr elusen ei chanolfan ei hun bellach sy’n defnyddio methodoleg Montessori yn ei haddysgu.

Mae ei ddiddordebau hefyd yn ymestyn i’r sector ynni, lle mae’n awyddus i gefnogi mentrau sy’n grymuso cymunedau ar lefel lleol. Mae wedi bod yn weithgar yn y maes hwn ers sawl blwyddyn fel buddsoddwr a hefyd fel cyfarwyddwr cymdeithas ynni cymunedol sy’n rhedeg tri thyrbin gwynt ar Ynys Lewis.

Mae Martin hefyd yn canolbwyntio ar ei ffordd o fyw ei hun, o ystyried yr argyfwng newid hinsawdd yr ydym yn byw drwyddo, ac mae’n ceisio lleihau ei ôl troed ecolegol trwy redeg car trydan, dibynnu llai ar y grid trwy osod systemau solar ffotofoltäig a solar thermol a thrwy ynysu ei gartref. Mae Martin yn byw yn Sir Buckingham ac yn mwynhau cerdded ym Mryniau Chiltern yn ei amser rhydd.

Julia Lim

Symudodd Julia i fyw gerllaw Llanbedr Pont Steffan yn 2013 ac mae’n byw ar dyddyn bach 2.5 erw gyda’i gŵr, lle maen nhw’n gweithio i leihau eu hôl troed ar y tir trwy ailddefnyddio dŵr cymaint â phosib, a chasglu dŵr glaw ar gyfer yr ardd.

Maen nhw’n tyfu bwyd iddyn nhw eu hunain a’r gymuned heb blaladdwyr, gan annog bywyd gwyllt ac yn dilyn egwyddorion parafaethu. Fe wnaethon nhw ynysu eu cartref, tŷ pecyn Sgandinafaidd, yn fuan ar ôl symud, ac yn ei gynhesu gydag un llosgwr coed, ac maen nhw wedi plannu helyg biomas ar ei gyfer.

Mae hi’n ddysgwr Cymraeg brwdfrydig ac yn mwynhau’r cyfleoedd niferus yn yr ardal i ymarfer a gwella’i Chymraeg.

Prynodd Julia gyfranddaliadau yn y tyrbin, ac mae’n gefnogwr ynni adnewyddadwy a gynhyrchir lleol, dan berchnogaeth leol, fel un o’r ffyrdd mwyaf democrataidd o fynd i’r afael â  heriau newid hinsawdd.